قواعد التعامل مع مدام "ميرفت" اللي في الدور التاني..

- إوعى تقول لها  "صباح الخير"، الكلمة دي بتضايقها.. خلاص؟ .. الكلمة دي بتعصبها ..خلاص؟
- ماتضحكش.."كشملها" الضحكة بالنسبة لها شتيمة..
- خد معاك كل الورق بتاعك وبتاع أمك وأبوك وخالتك وعمتك وابن خالة بنت عمك .. حتى لو هتاخد معاك شهادة نجاح جدك في KG2.. محدش ضامن
- لما حد من اللي واقفين على باب مكتبها يقولك خد الدمغة دي خدها .. عشان هو حافظ مدام ميرفت أكتر منك..
- لوقالتك أي معلومة هي "صح" حتى لو قالتلك إن مقاس جزمتك 57 وهو أصلا 43 هي صح "إنت ايش فهمك إنت"؟
- ماتضحكش .."كشملها"
- حاول تتمسك بايمانك وتستغفر كتييير قبل ماتقابلها ..عشان أكيد هتكفرك..
- لما تشوفها بتقمع بامية إوعى تحسسها إنها بتعمل حاجة مش طبيعية .. خليها تشعر إنها بتطبخ أحلى من امك
- هتلاقيها دايما لابسة شبشب "زنوبة" أبو وردة .. دي الموضة على فكرة بس إنت اللي متخلف
- لو فكرت مجرد التفكير انك تتعصب هتلاقي رد واحد .."هو انت هتعرف شغلي اكتر مني"
- ماتضحكش.."كشملها"
- لو انتي بنت وشايفة نفسك "مُزة" مدام ميرفت هتطلع "الدكر اللي جواكي" عشان هي شايفة نفسها "مُزة" أكتر منك أكيد..
- لو هي قاعدة بتفطر إوعى .. إوعى تقاطعها .. إنت ممكن تشاركها اللحظة وتقولها بالهنا والشفا .. مطرح مايسري يمري..
- إوعى تخليها تاخد ورقك وتطلع بيه تختمهولك من الدور التالت في المصلحة .. صدقني ساعتها هتندم وتلعن اليوم اللي شوفتها فيه عشان الدور التالت ده بيتها..
- ماتضحكش.."كشملها"
- "الختم في الدرج" أقسم بالله "الختم في الدرج" .. أكدلها على المعلومة دي عشان هي بتنسى

التعليقات