أشهر 13 عبارة لـ«ست الحبايب».. «خد الزبالة وأنت نازل»

بمناسبة اقتراب  عيد الأم تداول مغردو موقع التدوينات القصيرة "تويتر"، أشهر كلمات الأم المصرية، والتي تتردد على مر العصور ، عبر وسم (هاشتاج) أكثر_كلمة_تقولها_أمي . " الحكاية " تبدأ احتفالها باقتراب أجمل الاعياد بمجموعة من اشهر عبارات "ست الحبايب ":
1- ماهو لو بتحفظوا المذاكرة زي ماتحفظوا الأغاني كده كان زمانكوا خدتوا نوبل، وكمان مافيش مذاكرة على الأغاني صاحب بالين كداب، وكمان هي المذاكرة بتخلص؟
2- إيه منظر الأوضة ده ؟! دي أوضة بنت !! ولو ولد برضه بتبقى دي أوضة ولد !!
3- أقسم بالله ترجعوا ماتلاقوني في البيت وماحدش هيعرفلي طريق.. وطبعاً بنرجع نلاقيها في البيت عادي ومجهزة الغدا، بس أنا نفسي أعرف فين المكان اللي محدش هايعرفه ده؟؟
4- خد الزبالة وأنت نازل وعشان أنا بنت وماعنديش أخوات ولاد برضه بأخد الزبالة وأنا نازلة !
5- هات لبن وعيش وأنت راجع.
6- كل يوم هات هات لما ربيتلى الهتهات مع انى مش عارفة ايه الهتهات ده.
7- "ولو جيت وجبتهولك" الجملة الساحرة اللي لما تكون ضايعة منك حاجة وقلبت عليها البيت وفي الأخر ماما بتجيبها وبتجيبني لمس أكتاف معاها.
8- أي مرض بيجيلك سببه إما أنك ماسك الموبايل طول الوقت أو أنك خففت هدومك حتى لو كنا في شهر أغسطس.
9- قوم الساعة بقت 10 هتتأخر ولما تصحى تلاقيها 7
10- هو أنا قاعدة على بنك .. وده لما تطلب فلوس كل يوم بتسمع نفس الجملة.
11- هو أنا الخدامة اللي جبتوها !! ومش هاتعرفوا قيمتي غير لما أموت..
12- ولو انتي بنت فبتسمعي الجمل دي على طول: مش عارفة هتتجوزي ازاي وانتي كده!، قومي اتعلميلك حاجة تنفعك بعد الجواز!، ربنا يكون في عونه اللي هياخدك!، وقومي اغسلي المواعين
13- شوية أدعية علينا بنسمعها على طول:
• لما تقولها ماشي الرد بيكون: مشش في ركبك
• نام نامت عليك حيطة
• قوم قامت قيامتك
• جاتك ضربة في معاميعك

التعليقات