استعادت الفنانة يسرا ذكرياتها وحكت عن موقف غريب تعرضت له بسبب معجب عاشق مجنون كان يرسل لها خطابات مكتوبه بدمه.

وحكت يسرا خلال حوارها مع الإعلامي عمرو أديب في برنامج "بيج تايم بودكاست" المذاع عبر قناة MBC: "كان زمان المعجبين بيبعتوا جوابات، في 2 خضوني من طريقة جواباتهم كانوا مسميني نجمة السماء، وفي واحد كان بيكتبلي الجواب بدمه يعور نفسه ويكتب".

وتابعت يسرا: "الراجل ده أتجنن وراح الخانكة ومات هناك، كان قبطان بحري بيتكلم 7 لغات، في صحفي في جريدة حكالي أنه شاف الشخص اللي بيحبني وبيكتب جوابات بدمه، وطلبوا مني نروحله المستشفى نعمل حوار، روحت المستشفى معايا المصور والصحفي وأخدنا الإذن، شفت راجل بيتكلم اللغات بشكل هايل، شخص يظهر عاقل ووراني أنه بيحنط أي طائر أو قط يقع في المستشفى، عنده أوضة تحنيط، حسيته شخص عاقل وبيفهم، اتكلمت معاه حكالي إنه كان بيحب واحدة شبهي بالظبط زمان ووالدها رفضه واتخانق معاهم فجابوه المستشفى، وسألني ها أمتى هنتجوز؟"

وتابعت يسرا حكايتها: "سألته إنت يرضيك أتجوزك من غير ما أروح اسأل بابا؟ وقلت له هروح اسأله وأرجعلك، فسألني ممكن أديكي الشبكة أنا محضرهالك؟ كنت أبتديت أحس بالقلق، ولقيته عامل عقد وغويشة من جزء من الشبشب بتاعه والحقن، أخدت الحاجة وخرجت وكنت زعلانةن كنت فاهمه لآخر دقيقة أنه بكامل قواه العقلية".

يذكر أن يسرا تغيب هذا العام عن دراما رمضان 2024، وكانت يسرا قدمت العام الماضي مسلسل "1000 حمد الله ع السلامة" مع محمد ثروت وشيماء سيف ومايان السيد وأدم الشرقاوي، والعمل من تأليف محمد ذو الفقار وإخراج عمرو صلاح.