يشير الرقم "1" في اللغة العامية الصينية للإشارة إلى الرجال غير المتزوجين، والذين بالتبعية لا يضيفون فروعًا لشجرة عائلتهم، فيسمونهم هناك بالعيدان العارية!

فما علاقة الرقم بالزواج بشجرة العائلة بعيد السناجل بيوم 11 نوفمبر أصلاً؟!

أكيد حضرتك فهمت بالفطر إنه تم اختيار يوم 11 نوفمبر للاحتفال بعيد السناجل هذا لسبب بسيط هو إننا بنتكلم عليه، مش علشان لأنه مثلاً عيد ميلاد حكمدار مديرية الترويش!

المُهم، يوم السناجل العالمي، أو عيد السناجل العالمي هو اليوم الذي أشرنا إليه وتعالى تأمل في التاريخ بوضوح هتلاقيه 11/11 يعنى كله عبارة عن الرقم واحد، ليشير للوحدة والعزوبية والسنجلة وطبعًا غياب الشريك أو الحبيب أو الزوج!

ويعود أصل هذا العيد للتسعينات وتحديدًا عام 1993، وتم ابتكاره في الصين واختيار 11/11 للدلالة على أشخاص يحاولون العثور على شريك آخر، كل اثنين منهم معًا ليصبح بالشكل السابق ذكره!

ويستغل الشباب هناك الاحتفال بهذه الطريقة كوسلية للتعرف على عزاب آخرين، يعني بلغتنا المصرية الدارجة (والمتجاوزة قليلًا) بيستخدموه "للشَقط"!

وفي عام 2011 بالذات سمي عيد العزاب وقتها بعزاب القرن بسبب تعدد الرقم 11 فكانوا يكتبونه 11/11/11!

وبالعودة للعيدان العارية فقد جاء العيد كنوع من التحدي لعيد الحُب، هنا ناس مش لاقية حبيب يا عيني، وهنا ناس عندها حبيب وبتجيب هدايا وبتحتفل وحياتها زي السكينة في الحلاوة بالقشطة!

وفي يوم السناجل العالمي، يبحث الملايين عن سنجل آخر ليكونا معًا "كابل" يعني اثنين متفاهمين أو متحابين أو زوجين سعداء أو ضاربين بعضهم بالقديمة كما نرى كثيرًا!

والسؤال المُهم دلوقتي: حضرتك عود عاري من إياهم، وسيكون عليك الاحتفال بالعيد بتاعك والبحث عن شريك تكمل معاه حياتك، واللا إنت متزوج وبتتمنى تحتفل بالعيد ده وبتبحث عن أي طريقة تخليك عود عاري لأنك مأخدتش حاجة من العود المتغطي؟!

والسؤال الأهم: بذمتك إنت سمعت العيد ده قبل كده؟!

والسؤال الأكثر أهمية: هل العيد ده "عَلَق" معاك وهتفكر فيه شوية أو تعيره أي اهتمام أو تحاول تحتفل بيه مع أصحابك، واللا هتطنش ولا كأنك شوفت حاجة؟!

والسؤال فائق الأهمية: هل العيد ده ممكن يخليك تفكر في الجواز، أو يكون سبب في زواجك، أم أنك بتحب تنام خفيف زي كل المحظوظين في هذا العالم؟!