والله العظيم انتو ناس تافهة ومش لاقيين حاجة تتكلموا فيها. السجادة يعني بتاع سيادة عربية موكب سيات الريس هي اللي حارقاكو قوي؟
يعني خلاص بقى نسيب كل حاجة ونتكلم على السجادة؟ هتفضلوا طول عمركوا تمسكو في الهايفة؟!
مرة سجادة ومرة التفريعة ومرة نقعد ننبط في الفاضية والمليانة ونزيط على خساير قناة السويس بعد ما اتصرف عليها اربعة وستين مليار!!
يعني مفيش حاجة مفيدة تتكلموا فيها غير الخيابة دي، هي ومشروع المليون شقة والمؤتمر الاقتصادي؟ خلاص يعني الموضوعات المهمة خلصت؟
لأ والأتفه بقى الأتفه إنكوا تقعدوا تهروا في حكاية اللنض الموفرة والطاقة الشمسية وعربيات الخريجين، والا في تهجير أهل رفح والإرهاب اللي زاد ما قلش بعدها. دي يعني الحاجات المهمة؟!!
نسيب كل حاجة ونتكلم في التفاهات بتاعتكو!!
هو ده يعني اللي هيفيد البلد؟
انكوا تسيبوا حالكو ومحتالكو وتقعدوا تهروا مرة في التعذيب ومرة في سد النهضة واهو أي كلام وخلاص.
قال يعني بتفهموا في كل حاجة.
خبرا يعني اسم الله عشان نقعد بقا نفتي في كوبري سوهاج ونقص المية وعلاج فيروس سي، وجهاز الإيدز، وبيع الهرم حتة حتة، والبنوك بنك بنك وانهيار التعليم، وفشل منظومة الصحة، واختفاء الدولار وانسحاق الجنية!!
خلاص؟؟ مفيش حاجة عليها القيمة تشغلوا وقتكوا بيها؟
يا عالم يا تافهة شوفوا حاجة عدلة اتكلموا فيها بدل التفاهات اللي انتو عايشين فيها دي!!