لما بنقول إن اللي بيقتلوا أقباط (أو مسلمين) دوافعهم دينية ما بيكونش المقصود إن الدين هو السبب، أو إن الإسلام دين قتل وعنف. بالعكس تماما.
المقصود إنهم ارتكبوا الجرائم دي مدفوعين بتصور شاذ لا يتفق مع الإسلام أو القرآن أو تعاليم الرسول الذي بعث ليتمم مكارم الأخلاق. تصور بيفترض إن القتل والتدمير وسفك الدم هو جهاد في سبيل الله ولمرضاة رسوله.
هم، مش أنا، شايفين إن تصرفاتهم تستند للدين، وبالتالي دوافعهم دينية.
تصورهم ده مش هيتغير لما تجي لي أنا وتدبدب برجلك في الأرض علشان شايف ان الدين مش كده.
الأحسن تروح تناقشهم وتشرح لهم إن ده مش الدين الصحيح زي ما انت شايفه، أو تشارك معانا في تشريح وانتقاد المشايخ اللي بينشروا تفسيرات للدين أو اقتباسات من السلف بتدعم الآراء الشاذة القاتلة وبتدعم تصور القتلة إن ده هو التدين والجهاد اللي بيرضي ربنا. ويبقى واجبك انك تنشر وتشير الكلام اللي أنا وغيري بنكتبه في السياق ده علشان تنتصر لرأيك واعتقادك وإيمانك بإن ده مش هو الدين والعنف والقتل مش من الإسلام.
أفهم انك تنزعج من كلامي لو انت شايف فعلا إن التفسيرات الشاذة دي هي الدين، وإن السلف كانوا ناس خبرة وآراءهم جت بعد أن أفنوا أعمارهم في "علوم" الفقة والعقيدة.
في الحالة دي ما تزعلش من حكاية ان "دوافعهم دينية" بأي مفهوم..
بالعكس.. لازم تدافع عن القتلة لإنك متفق معاهم في الفكر والعقيدة، والخلاف الوحيد بينك وبينهم انهم عملوا اللي انت لسه ما عندكش الشجاعة تعمله.