اذا تشابه ما اكتبه مع اى حدث او واقع فالعيب اكيد فى شخصى باعتبارى مواطن غير ذكى فى واقع ذكى جدا ....و بإمارة هذا الجراج الفريد من نوعه فى مصر فهو بيركن لوحده !
..........

فتحت الفيديو القصير فى موقع اخبارى شهير ورسمى ! يعنى أخباره مش مضروبة او اشاعات والعياذ بالله وزيادة فى التأكيد ومنعا لافتاكسات وغرامات هيئة الصحافة قررت ايضا فتح الخبر المصاحب له... لأن الفيديو كان اعلى من متوسط احاباتى ودرجاتى ودوختى بعدها على تخصصات عابر السبيل الصحفى !فقمت بفتح الخبر المصاحب له ولكن لاسف ،اى الخبر كان ايضا أعلى من معامل ذكائى الذى يتساوى تماما او يقل قليلا عن دخلى الشهرى وهى علاقة شبه طردية بين الاثنين ! ولذلك قررت نشر الخبر حتى تعم الفائدة واعثر على أحد يرد على وافهم واتنور وانشر الإيجابيات !
الخبر واضح جدا وتصريح المسؤولون وليس المسؤولين ؟فيه بالتفصيل الملل ( ما عدا رئيس الوزراء) للحقيقة لم اجد له بنت تصريح كده على وزن بنت شفة ويبدوا والله واعلم ان رئيس الوزراء أصيب مثلى بالذهول ؟!
فالسيد اللواء والسيد المهندس ..اسفة اللواء محافظ القاهرة ( لا اعرفه)ومعه المهندس مدير عام الجراج ايضا (لا اعرفه ) مسكوا فى الشرح وهات يا كلام عن مزايا إقامة اول جراج ذكى بمنطقة روكسى بمصر الجديدة ... وبإشادة منقطعة النظير وانسياب مطلق فى حركة الشرح والمرور الإلكتروني والإشارات اللوحية الاتوماتيكية و قالوا ان ذلك يتناسب مع خطة مصر ٢٠٣٠ ؟ وبذلك استفتحت بهذا الكلام يومى وقلت هايل وهو المطلوب ٢٠٣٠ اخيرا واحمدك يارب
ولكن بعدها عينيك ما تشوف الا الحادثة وليس النور اكيد !
أخذ مضمون الخبر يشرح ويشرح وقال (إى الخبر )وبما نفهم منه ان العربية اسم النبى حارسها وليس (حرصها وصيابنها )رسوم الركن لمعاليها أقصد السيارة طبعا تبلغ فى الشهر الواحد بالجراج الذكى ٢٧٥٠ جنيها مصريا فقط لا غير وبالحروف الفى جنيه وسبعمائة وخمسين او خمسون ايهم أصح ؟ .. ولكن لاسف لم يسترسل معاليه وقال ده معناه شهر من غير إجازات ام شهر مشفى ؟ وواضح ان العيب فى الصحافة التى لم تسأله هذا السوءال الوحدوى الوجودى ايضا؟
وطبعا فرحت جدا و صفقت وهتفت من قلبى با بلاش والله! لاسيما وان هذا السعر بتسهيلات جراجية لمساعدة محدودى العربيات للركن من أمثالى الذين لا يمتلكوا إلا عربية واحدة بأربع عجلات وزرت السيدة للدعاء للحصول على فردتى كاوتش جدد بعد ان انتهى عمرهما الافتراضي ومعهم مرتبى كمان ! وان كل هذه التسهيلات تتم حتى نساعد على انسياب حركةالمرور لان السعر الحقيقى العادل طبقا لاستخدام الجراج الذكى هى ٣٥٠٠ جنيها فى الشهر حاصل جمع وليس طرح مبلغ ٢٠٠٠ جنيها رسوم اشتراك منهم للفترة الصباحية باعتبار اننا شعب صباحى وكده؟ و١٥٠٠ جنيها للفترة المسائية على اعتبار اننا شعب مسائى ويحب شم الهوا والجلوس على المقاهى وشرب الشيشة وتشجيع مو صلاح والذى منه !وان الساعة الواحدة ب ١٥ حنيها (با بلاش والله ) والسعر ذكى فعلا ومستحق لتعب الجراح وتحمله ثقل العربيات ؟
المهم وباعتبارى من سكان مصر الجديدة بعد الجواز وليس قبله ؟قلت وأعيد تسميع منطقة مصر الجديدة باعتبارى من أنصار الحفظ المرورى وجى بى اس لوحدى وخبرة طويلة فى أعمال المرور والمسالك والدروب وسكة ابو زيد الهلالي كلها مسالك
فوجدت ان المنطقة دى اغلب من ينام مع سيارته تحت شباكه يعنى من وجهاء وقدامى عصر الطبقة المتوسطةقبل انتقالهم للقاهرة الجديدة واغلبهم معاشات بالضرورة وافخم واحد فيهم معاشه اقل من نوم سيارته فى السرير الذكى اقصد الجراج الذكى! طيب نقًول ان الجراج الذكى هيستخدمه الشباب من غير اصحاب توكتوك حبنا وسيارة الهنا ياريتنى كنت أنا ... وجدت انه يادوب لو اشتغل زميل لى بالصحافة دخله لن يصل بحده الأدنى الى أسعار مولانا الجراح فى الشهر ؟! لا سيما وانه كمان غير مكيف يعنى السيارة هتسخن وتعرق !؟
طبعا انا اول ماسمعت الأسعار عقلى اصبح لوح حسابى ومفاتيحه الجمع والطرح اصبحت مغلقة بكتاب اللوغتمارات ووبعد سين وجيم منى لعقلى الباطن طبعا لانى اكتشفت انى هضطر اترك العربية على الباب وهى هتطلع تركن اتوماتيكى وتنام لوحدها داخل الجراج ؟وان الذكاء ده هونسب الجراج فى الركن يعنى اصله وفصله مختلف تماما عن الركن فى المريخ مثلا لان الاخير ده اسمه ركن فضائى للكائنات الافتراضية والتى لم أتعرف عليها حتى الان ولكن اتمنىً والله مستقبلا إلا أصبح منهم !ولذلك فأن اطلاق اسم الدلع للجراج وللتذكرة وهو ذكى اسم على مسمى بصحيح ؟

المهم خدتها من (قصيرها )ولا اعرف معناها ؟ولانى عندى مشاوير فى هذه المنطقة وزيارة مرضى لان اولياء الله الصالحين بالقاهرة القديمة فقط
وقلت اركن عند محمد والذى اعرفه احسن من الذى لاتعرفه والساعة بخمسة جنيه فقط ومن فات قديمه تاه وبالفعل وجدت محمد اكثر ازدحاما ومشغول جدا جدا بل و يطلب منى من طرف لسانه وبعنجهية كده (١٠ جنيه فى الساعة )ولو مش عجبك اركنى عند الذكى !
طبعا زعلت على العشرة القديمة بينى وبين الشوارع والنوم اليومى للعربية فى الهواء الطلق ؟وبعد فصال وهات وخد وهرى أخذ محمد منى العربية بنفسه يركنها صف عاشر وفوق الرصيف وانا اللى عمرى كله قضيته أركن تحت الرصيف !؟ بل واحتفظ بالمفتاح كمان وكل ده لانى فاصلت معه وطبعا رضخت وقلت ماشى للسعر الجديد وللباشا محمد خاصة انه بيشقى على عياله فى المدرسة الاجنبية ! ورضيت بالعشرة جنيه احسن من ١٥ جنيه برضه وانا الكسبانة ؟
ومشيت بعدها اكلم نفسى فى فائدة هذه الوظيفة العظيمة والهامة التى تدعمها الحكومة كمان بأسعارها التشجعية لنا ٢٧٥٠ جنيها فى الشهر بدل ٣٥٠٠ جنيه للركن الشهرى ! ولمعت فى ذهنى الاستقالة فورا بلا صحافة ووجع مخ ومرتب يدوب يكفى ركنة سيارة ونصف ! لانى لا اعرف هل سيحاسب التوكتوك او عجلتى وهو وسليتى المستقبلية بنصف نفر اقصد نصف سيارة ام نفر كامل !وتفتقت بنات افكارى وبراءة الاختراع لدماغى فى لمشروع مستقبلىً بعمل جراج بيتى ! يعنى هعمل مشروع صغير كده محندق واخد عليه تبرعات وقروض وهو تأجير شقة دور ارضى بجنينة فى روكسى واركن فيها (بيات ونوم غير اللى بالساعة والعدادة بتحسب ) ييجى ١٠ سيارات فقط لأغير لعرض النوم وبعرض مغرى جدا جدا ١٥٠٠ جنيه شهريا وبالأفطار كمان للمركونونيين يعنى غسيل وتلميع وبكده هدفع ايجار الشقة وفوائد القسط ووفرت وظيفة لى الان وبعد المعاش وبمرتب مجزى جدا جدا وبنفسى هدخل العربيات على اعتبار انى بخاف على سمعة زبائنى جدا ولا اسمح باى تحرش او احتكاك سيارة بأخرى حتى لو متغطبة !
اختمرت الفكرة فى ذهنى تماما وقررت اعمل دعاية لنفسى واكتبها وانشرها كمان فالرزق يحب الذكاء اقصد يحب الخفية وأسعى يا سيارة وانا أسعى معك والباب مفتوح لجمع التبرعات اقصد الاشتراكات للركن الغبى بالإفطار وبدل غسيل وتجريح واللى مش عاجبه يركن عند الحكومة !

"عن المصور"