علمتنا الكورونا
Friday, June 5, 2020 - 19:34
اننا ممكن نشتغل من غير ما نروح الشغل!
وممكن نتعلم من غير ما نروح المدرسه!
اننا ممكن نقابل ناس من كل بلاد الدنيا من غير ما نسافر !
اننا نمارس رياضه في البيت وان الجيم دوشه من غير لازمه !
علمتنا ان اكل البيت احلي من الدليفري وان الرجاله بتطبخ احلي من الستات!
علمتنا اننا نقدر ندور احوالنا وحالنا بضغطة زر علي تليفون عبيط في جيبنا !
علمتنا اننا مش لازم نتصافح علشان نكون اصحاب!
أو نتعانق علشان نكون احباب !
علمتنا ان مش كل اللي عندنا عاوزينه
وان معظم الحاجات اللي عندنا ملهاش لازمه في وقت الازمه!
علمتنا اننا نصلي من غير ما نروح الجامع ! ونسبح في سرنا من غير ما يكون فيه إمام !
علمتنا ان فرحة العيد في القلب
وان فسحةالعيد ممكن تكون في لمة العيله في البيت !
علمتنا ننسي ونستغني عن اشياء كنا فاكرينها ضرورية وطلع ملهاش اي داعي!
في الاخر علمتنا ان المرض ملوش كبير ، وان الخطر ممكن يكون اقرب من نفس نتنفسه أو لمسة إيد ... وطلع كلام امي الله يرحمها كان صح لما قالت لي؛
اللي بياكل علي ضرسه يا ابني بينفع نفسه !
شكلي اتعودت !!!
(من صفحته)
التعليقات