“نحن شعب غير مؤهل للديمقراطية في الوقت الحالي” الجملة الأشهر للراحل عمر سليمان. الجملة دي تمعّنت فيها مراراً وتكراراً واكتشفت انها صح مليون في الميّة، من ساعة ثورة ٢٥ يناير لحد دلوقتي بنطالب بالديمقراطية واحنا من جوّانا ديكتاتوريين بعنف. احنا ليه بنشتغل نفسنا ؟ هاتلي شخص واحد بيحترم الرأي والرأي الآخر. على رأي الزعيم عادل إمام في مسرحيته الشهيرة “واد سيد الشغال” من برّة أُبة أُبة ومن جوّة إعّا إعّا ! عايزين الكون يمشي على مزاجنا إحنا، وفي حال إختلاف الطرف الآخر في الرأي بنعمل عليه حفلة ونعزمه فيها بداية من أصدقائنا لعائلاتنا لمطربينّا المفضلين.

امبارح الكينج محمد منير عمل حفلة في شرم الشيخ لدعم وتنشيط السياحة والمحافظ طلع شكر فيه وفي رئيس الجمهورية وبعد الحفلة مباشرة الناس قلبت على منير في مواقع التواصل الإجتماعي انه ليه وليه بقى مع النظام قلباً وقالباً بعد ما كان طول عمره معارض وازاي يغنّي “حدوتة مصرية وشجر الليمون” وهو مؤيد للنظام وكلام كتير اتقال زي “راحت عليك يا ملك، مكنش العشم يا منير، كنت بحترمك وبحبك، ازاي منير بقى بيطبّل كده الخ ..” والمشكلة ان اللي بيقول الكلام ده جمهور منير نفسه مش جمهور مطرب تاني. جمهور منير اللي اتربى على أغانيه وكبر وفهم الدنيا عليها.

السؤال هنا.. نعم يعني ؟ ما تسيب اللي يؤيد يؤيد واللي يعارض يعارض. انت ليك ايه عنده غير انه يمتعك بفنّه ومزيكته اللي اتربيت وكبرت عليها ؟ يعني انت عايز تفهمني انك هتمحي من ذاكرتك أعمال خلدها التاريخ علشان آرائه السياسية مبقتش بتتفق مع حضرتك في الوقت الحالي ؟ ماهو ياما هوّن علينا الأيام الكرب اللي كنا عايشين فيها لما غنى وقال “اتكلمي ليه تدفعي وحدك الثمن اتكلمي” وياما غنالك وقالك “لا يهمني اسمك لا يهمني عنوانك لا يهمني لونك ولا ميلادك” وقالك بردو “طول العمر العسكر عسكر بس الناس الناس كات ناس” الناس مالها بقى بقى متضايقة ليه ؟ انت مالك بانتماؤه السياسي ؟ انت بتحاسبه ليه هو انت ربنا ؟ ده راجل بيصنع فن علشان يخليك مبسوط، مبسوط وبس ! وانت يا تنبسط بفنّه يا متسمعوش وليك مطلق الحرية الكاملة. تيجي انت تهد كل حبك ليه في لحظة بمنتهى البساطة كده ؟ طيب افتكرله “ياللي انت حبك حرية في العشق آه ولا شيء ممنوع” اسمعله “بريء بريء بريء ومين ملوش خطية ؟” الراجل ده بعد عمر طويل ان شاء الله لما يموت هتفضل تسمع أغانيه غصب عنك لإنها بتعبّر عن كل حالاتك ومش هتلاقي زيه تاني لإن مفيش منير تاني ! على فكرة انت مش محتاج تتوب لأن حبه مش ذنوب ولا عشقه خطية ! خليك بميت جناح والمس السما متبقاش زي البراح اللي عمال بيضيق، يا أخي علّي صوتك بالغنا علشان لسه الأغاني ممكنة، لو هتقدر تغيّر غيّر لو مش قادر انت لازم تتغيّر وتغيّر، يا ناس يا ناس يا مكبوتة هي دي الحدوتة والله، افرح باللي بيخليك مبسوط ويدّيلك أمل في الحياة وايّاك تكون زيهم تروح وتجرحه علشان انت الوحيد منهم اللي تقدر تريّحه.