بقلم: أنور الوراقي

بصراحة مش محتاجين مجهود لنشارك بهذه الطريقة فى هاشتاج #قومي_اعملي_لي_شاي ؛ فهناك أوقات ومواقف ميقدرش الراجل يقول الجُملة دى لمراته فعلاً، وهى أكتر من محاولة إحصاءها!

1-   فى آخر الشهر، وحضرته مأشفر، يعنى مفيش فى جيبه ولا مليم، وقتها ميقدرش يتكلِّم بقلب جامد ولا يقول لها قومى اعملى لى شاى، بدل ما ترُد عليه وتقول له طيب قوم هات حاجة من البقال، أو السُكر خلص انزل اشترى، أو حتى هات أشترى أنا، فبلاها شاى خالص أحسن يا عم!

2-   طبعاً هناك حالات مُشابهة وهى موسمية بزيادة ـ غير آخر الشهر ـ زى دَخلة رمضان، والمدارس، ووقت فلوس الدروس، وقبل الأعياد، كُل دى أوقات مينفعش الراجل يطلُب من الست تقوم تعمل له شاى؛ لأنها فى المُقابل هتطلب منه الياميش، أو الخروف، أو شُنط المدرسة والكراريس والأقلام، ومش بعيد تطلُب منه كمان والعياذ بالله قسط الجمعية اللى هو مطنِّش عليه، أو تكون بتفكَّر تجيب تلاجة جديدة بدل اللى بقت سخَّان دى من كُتر أعطالها!

3-   لو كانت الست دايماً بتنسى نور المطبخ والع، وأسعار الكهربا نار، فهو أكيد هيضطر يقوم يطفيه بعد ما تعمل له الشاى، وقد يرجع يلاقى ريموت التليفزيون اتاخد، فتحصل خناقة، كُل دة علشان عملت له كوباية شاى، بلاها الشاى ويخليه مرتاح أحسن على الكنبة، وشبطان فى الريموت!

4-   لو شافها قاعدة مكلبشة فى النكد، وبتتلكك على فُرصة تنفجر فيها وتسوِّد الليلة والبيت، سواء هو عارف السبب أو ميعرفش؛ فالأفضل يبعد عنها بدل ما تهبده الموشَّح التمام عن التعب والإرهاق والمجهود والعيال والخدامة اللى مش بترتاح ولا بتعرف طعم النوم ولا الراحة علشان ناس معندهاش دم مش بتبطَّل طلبات وهى قاعدة على... الكنبة.. مين صحيح الناس دول؟ ملناش دعوة منعرفهومش!

5-   مُمكن تكون قاعدة بتتفرج على فيلم عربى رومانسى، أو مسلسل تركى، من اللى بيبقى فيه العيال شعرهم طويل وعيونهم حلوة وملوَّنة دول، طبعاً هى هيمانة، ومُتخيلة نفسها (سمر)، وعايشة الدور ع الآخر، خصوصاً فى اللقطة اللى الواحد بيجيب فيها الفطار لمراته فى السرير ويصحيها علشان تفطر، فمينفعش إنت تفصلها فجأة بالشكل دة وتقول لها قومى اعملى لى شاى، وإنت بتمسح النضارة كعب الكوباية، أو بتدوَّر على فردة الشبشب التانية برجلَك، وإلا هايبقى آخر يوم فى عُمرك، وهتموت من غير ما تشرب الشاى!

6-   على سيرة النُقطة السابقة، فاكر فيلم "غاوى مشاكل" بتاع (عادل إمام) و(نورا) لما كان عايز يشرب الشاى طول الفيلم؟ طبعاً لو كانت نية الزوج بالشكل دة، فأكيد هايبقى الشاى فعلاً هو آخر اهتماماته لأنه تحوَّل لمُجرَّد "سيم".. هنيالَك يا عم، طبعاً وقتها لو هى عايزة تعمل لك شاى بجد فى المطبخ إنت أكيد اللى هترفض، بالذمة دة وقته.. ماشى يا سيدى!

7-   إلحاقاً بالنقطة السابقة، ميقدرش الراجل يقول لمراته أبداً قومى اعملى لى شاى لو لا قدَّر الله وجانبه التوفيق لأى سبب، إرهاق، ضغوط عصبية، هُزال، ومُعظم هذه الحالات بتبقى صباح الجمعة، طبعاً هو لو قال لها قومى اعملى لى شاى، غالباً مش هترُد عليه بالكلام، يكفى البصَّة بس اللى هتقلِّب المواجع، وهتخليه يلف حوالين نفسه، بلاش أحسن يا عم.. مش كدة؟!

8-   طبعاً الراجل الزملكاوى بالذات ميقدرش يقول لمراته تقوم تعمل له شاى، مش علشان مراته أهلاوية، لأ بغض النظر، دى حتى لو كانت بتشجَّع مركز شباب كوم امبو.. أصل كُلهم معلمين على الزمالك!

9-   لو عندهم طفل صغير وزنان، مستحيل راجل عاقل هيقول لمراته قومى اعملى لى شاى، لأنها وقتها هتقول له شيل العيل على ما أعملهولك، وأكيد هتدخل تقعد فى المطبخ ساعتين علشان تستغل الفرصة وتغسل المواعين، وتعلَّق على اللحمة لبُكرة، أو تنضَّف السمك، أو تسيَّق البوتجاز، فطبعاً طُز فى الشاى واللى عايزينه، بلاش منه!

10- السبب الأخير هو طبعاً وهمى، ومن وحى الخيال التام، لكن تعالى نقوله وخلاص، جايز يكون فيه واحد فى التسعين مليون ينطبق عليه هذا الأمر، وهو إنه مش هيقول لمراته قومى اعملى لى شاى؛ لأنه بيحبها ومش قادر يستغنى عنها دقيقتين.. سامحنا يا رب!