تداول مستخدمو مواقع السوشيال ميديا في الساعات الاخيرة حوار خيالي  ساخر بين اب وابنته في سنة ٢٠٣٠ ، وكشف الحوار بحسب تعليق د. احمد ابو زيد استاذ الاجتماع عن انهيار مستوي القيم في المجتمع وعن تصاعد لغة المال والثراء في المجتمع عوضاً عن قيم التعليم والثقافة وتراجع المهن التي كانت تعتبر في مصر مهن الصفوة من ابناء الطبقة المتوسطة التي تعتبر العمود الفقري لأي مجتمع .

وفيما يلي نص الحوار :

-بابا

 

*أيوة يا بوسي

 

-انت معودنا على الصراحة من صغرنا صح؟

 

*ايوة صح.. في ايه يا بوسي؟

 

-في موضوع عايزة أكلم حضرتك فيه بس خايفة

 

*لا يا حبيبتي متخافيش.. قولي يا بوسي في ايه؟ عايزة تغيري عربيتك؟

 

-لا العربية اللي معايا كويسة.. بصراحة.. أصل... هو........ عـ.....

 

*قولي يا حبيبتي مفيش اي مشكلة... ليه مترددة؟ عايزة تسافري سويسرا مع عمك وبنات عمك؟

 

-لا يا بابا مش السفر لا...

 

*امال ايه يا بسبوسة؟

 

-بصراحة يا بابا في واحد عايز يجي يقابلك!

 

*ههههههه.. هو ده بقى اللي مخليكي مترددة كل ده؟؟.. يا ستي اهلا وسهلا يجي يقابلني ف المكتب اي يوم.. والله كبرتي يا بسبوسة وبَقى في واحد عايز يقابلني عشان يخطبك.... عايز يقابلني عشان يخطبك صح؟ 

 

-أيوة يا بابا عشان كده.. بس.... أصل......

 

*اصل ايه؟

 

-هو محرج من حضرتك

 

*ليه؟

 

-أصله مش من مستوانا الاجتماعي والمادي وكده

 

*ليه بيشتغل ايه؟؟

 

-بيشتغل.... بيشتغل.......

 

*في ايه يا بوسي ماتقولي علطول!

 

-بصراحة بقى يا بابا هو مهندس!

 

*ايييييييه!!! مهندس!!!!

 

-بابا أرجوك اسمعني الاول عشان خاطري

 

*خاطرك ايه وزفت ايه! مهندس يا بسنت؟!! مهندس؟؟!! مهندس من قاع المجتمع؟؟

 

-يا بابا والله هو انسان كويس اوي و مكافـ.......

 

*كويس ولا مش كويس لنفسه بعيد عّن بنتي! يبقى كل يوم بيتقدملك صفوة المجتمع من لعيب الكورة لسباك لمقاول لنقاش لمبلط لتاجر وترفضيهم وف الاخر عايزة تتجوزي مهندس!! مهندس يا بسنت!! وأهله مستواهم ايه؟؟ هتقوليلي دكاترة بقى!! 

 

-(بدايات عياط): هو فعلا باباه ومامته دكاترة، بس يا بابا ارجوك اديني فرصة اشرحلك بس!

 

*لا تشرحيلي ولا اشرحلك!.. وعرفتيه ازاي المهندس ده؟؟ وأمك فين من المهزلة دي؟! يا مروة.. مـــــــروة!

 

الام: أيوة يا سيف في إيه؟؟ بتزعق ليه؟؟ في ايه يا بوسي؟

 

*اتفضلي بنتك! عايزة تتجوز مهندس!

 

الام: ايوة عارفة..

 

*عارفة؟!

 

الام: بصراحة ايوة كنت عارفة.. واهدى خلينا نتفاهم بالراحة عشان انت قلبك مريض ومش هتستحمل الانفعال..

 

*نتفاهم ف ايه يا ست هانم؟ نتفاهم ف ايه؟؟ اقول للناس ايه؟؟ تعالوا احضروا فرح بنتي على مهندس؟؟

 

الام: المهنة مش كل حاجة يا سيف.. ياما مهندسين ودكاترة ومحاسبين واساتذة جامعات لكن مكافحين وكويسين و.....

 

*الكلام ده كان زمان يا حجة!.. ف بدايات القرن الواحد والعشرين.. فوقي انتي وبنتك من الاوهام دي!.. مش هجوزها واحد شحات ومريض نفسي موهوم بأهمية العلم ويطلع عليها عقده! وبعدين انا هتجنن! عرفته ازاي؟!! عرفتيه فين وإزاي وامتى المهندس ده يا بسنت؟؟ انطقي!

 

(بسنت وهي بتعيط): عرفته ... عرفته... ف الـ........

 

*انطقي!

 

-(بسنت بانهيار): صاحب يوسف اخويا!

 

*(بصدمة): يوسف أخوكي! يوسف أخوكي هيعرف الأشكال دول منين وإزاي؟؟ النادي كله ناس لعيبة كورة وصنايعية وتجار ف مستوانا!..

 

(الأم باستسلام): يوسف أتعرف على شلة طلبة جامعيين.. طب وصيدلة وهندسة وعلوم و...........

 

-(بصدمة أشد): طب وصيدلة وهندسة علوم؟؟؟ ابني انا؟؟ دي مؤامرة بقى!.. وانا اقول الواد ماله مش مظبوط وكنت فاكره أدمن!! ياريته كان أدمن بدل المصيبة دي!..

.. وانتي كنتي عارفة يا مروة؟؟

 

الأم: أيوة يا سيف كنت عارفة.. يوسف بقاله ٣ سنين بيزوغ مِن تمرين الكورة ويروح يذاكر معاهم ف شقة ف المقطم

 

-هي حصلت مذاكرة ف شقق كمان!! شوية شوية هتقوليلي عايز ياخد بكالوريوس!!.. آآآه!! هاتيلي دوا الضغط من جوة بسرعة!..

 

الأم: ابنك مش بيحب الكورة ومش ماشي فيها يا سيف.. وبيضغط على نفسه عشان يرضيك.. وطول عمره بيذاكر مِن وراك..

 

-آآآه.. مش قادر أتنفس .. آآآه .. عمري كله راح هدر.. آآه..

 

الأم: يا سيف أرجوك ماتعملش ف نفسك وفينا كده.. الفلوس مش كل حاجة.. الولاد نفسهم يتعلموا!

 

*وطول السنين دي بتخدعيني يا مروة!.. انا مش قادر اصدق!.. آآآه يا قلبي.. صدري مقبوض ودراعي الشمال واقف مِن الوجع.. آآه

 

(الأم): روحي يا بوسي هاتي دوا الذبحة مِن جوة.. هتعرفي تعملي لبابا CPR لو حصله arrest لاقدر الله؟؟

 

*(الاب بوهن): انتو بتقولوا ايه؟؟ آآه يا صدري.. انتو بتقولوا ايه يا مروة؟؟.. آآه..

 

(الأم): بنتك ف امتياز طب يا سيف.. وانا مش ربة منزل زي مانت فاكر .. انا طبيبة.... وابنك يوسف مش لعيب كورة.. يوسف ف تالتة طب أسنان... ومنضم لتنظيم سري للدراسة الجامعية وبيذاكروا ف شقق مفروشة.. والمهندس اللي عايز يتقدم لبنتك عضو قديم ف التنظيم..!!