عبّر الإعلامي عمرو أديب عن دعمه الكامل للنجم المصري العالمي محمد صلاح، مهاجم نادي ليفربول الإنجليزي، مؤكدًا أنه يعتز به ويفتخر بما يقدمه داخل وخارج الملعب، ورافضًا ما وصفه بـ"الهجوم الممنهج" على اللاعب من بعض الجهات.

قال "أديب" خلال برنامجه "الحكاية"، إن محمد صلاح "إنسان كويس، أخلاق، ونظيف، ومصري محترم ووطني يشرف بلده والعالم العربي كله"، مضيفًا:

"مو صلاح ده مجاش زيه، وأنا مسؤول عن اللي بقوله، مجاش لاعب عربي زي محمد صلاح، فيه ناس قاعدين له بيتصيدوا له أي موقف عشان يشيطنوه، وعايزين يطلعوه ما يساويش تلات ساغ".

كما تحدث أديب عن الجدل الذي أثير مؤخرًا حول موقف "صلاح" قبل أحد المباريات، بشأن رفضه التوقيع على "تي شيرت" ليعلن دعمه لفلسطين، قائلًا: "القوانين الأوروبية والفيفا تمنع أي تعبير سياسي داخل الملاعب، والفانلة اللي كان ماسكها الشخص مش معروف مكتوب عليها إيه".

أضاف أديب مهاجمًا من وصفهم بـ"المجموعة المعادية لصلاح": "عندهم مومياء محنطينها وعايزينها تفضل أعظم اختراع بعد الكهرباء، وبيقارنوا بيها محمد صلاح، طب المومياء دي عملت إيه؟ اتبرعت بقرش زي اللي صلاح اتبرع بيه؟ محمد صلاح راجل محترم يشرف العالم العربي كله".

أردف: "هو صلاح إسرائيلي؟ صلاح بيشتغل مع الإسرائيليين؟ طبعًا لأ.. الراجل ده مصري، وطني، ابن بلد، وبيشرفنا كلنا، بس في ناس عندها هوس وبتحاول تشوه صورته بأي طريقة".

أكد عمرو أديب أنه لم يتحدث مع صلاح منذ فترة، لكنه شعر بالضيق من الهجوم عليه، قائلاً: "اتضايقت إزاي الولد بتاعنا يتم الهجوم عليه كده، وإحنا نسكت؟ كلكم بتشتغلوا في حتة واحدة، تشتموا الراجل بتاعي، هشتم الراجل بتاعكم، محدش يقرب لمحمد صلاح"

تابع: "اللي عمله صلاح إعجاز بكل المقاييس، ده جاي من بلد صغيرة في ريف مصر، وبقى الرابع على العالم والأول في قلوبنا، والراجل ده عمره ما غلط في حد، عنده أخلاق وموهبة واحترام".

اختتم عمرو أديب: "محمد صلاح ده مشرفنا ومنورنا، وإن شاء الله ياخد أحسن لاعب في العالم، هو أسطورة بحق، وده الراجل اللي فعلاً عمل تنمية في بلده وساعد ناس كتير.. انتوا ليه بتكرهونا في التاني؟ صلاح هو اللي يشرفنا كلنا".