تحدثت الفنانة حنان مطاوع عن إصابتها بحالة من الإحباط، بعد حصرها في أدوار صغيرة طوال 15 عاما، حتى أخذت فرصتها قبل سنوات قليلة.

وقالت مطاوع خلال ندوة صحفية شاركت فيها، إنها حصلت على فرصتها خلال السنوات الأربع الماضية بفضل طموحها، مشددة على أنها عندما جاءتها الفرصة أثبتت أنها تستحق أن تكون في الصفوف الأمامية.

وتابعت: "أنا مريت بإحباط قبل ما أوصل، لما كنت باخد أدوار صغيرة على مدار 15 سنة، وربنا كرمني آخر 3 أو 4 سنين، لحد ما أصريت إني أقبل وأحب اللي بعمله وأحس إنه شيء كبير".

وكشفت الفنانة الشابة عن كرهها لصفة "الغرور"، مشددا على أنها "لن تغتر أبداً لأنها لا ترى أنها تملك شيئاً من الأساس"، مضيفة: "الغرور ده يا رب ربنا ما يكتبه عليا، هو صعب أوي بالنسبالي".

وشرحت: "زي ما ببقى مبروزة أوي طموحي واللي عايزة أعمله، مبروزة أوي النهايات وعارفة إن مفيش حد مخلد وهنموت في الآخر وندفن في متر في متر، فأتغر على ِإيه؟".

وتطرقت حنان مطاوع للحديث عن أسرتها الفنية، معتبرة أنها "محظوظة" بوالدتها الفنانة الكبيرة سهير المرشدي، ووالدها الفنان الراحل كرم مطاوع.

وقالت الفنانة: "أنا كنت محظوظة جداً بعيلتي، مش عشان هما المشاهير اللي الناس عارفاهم، لأ عشان تركيبتهم نفسها، ومامتي عطية وهدية من ربنا، وبابا الله يرحمه برغم إني معشتش معاه كتير ومات وأنا مراهقة، بس أثر فيا في حاجات كتير أوي، وأنا تركيبة شخصيتي شبه بابا".