المصريين برعوا في نوعين من الفنون الحديثة على وسائل التواصل الجماهيري: واحد منهم فن القلش وده معروف. والتاني أقل حظا في تسليط الضوء عليه وهو فن "التلويش".
التلويش هو اختلاق "arguments" أو افتعال زوايا في المناقشة تنحرف بيها عن مسارها الطبيعي. مهما كان الموضوع واضح، "الملوش" من دول يسعى لاختلاق زاوية تسحب صاحب التعليق الأصلي في اتجاه آخر، وينتصر الملوش عندما يشعر من يكتب بضرورة الرد والتبرير.
والملوشين بيزدهروا في النقاشات الوطنية أو الدينية وبيستخدموا "ملوشات" مختلفة لكنها نمطية.
ممكن تكتب عن قضايا تعتقد إن مفيش عليها خلاف: القتل بدون مبرر، العنصرية، التجارة بالدين، الاختطاف القسري، التعذيب، الفساد، الظلم، الانتهاك. لكن الملوش من دول ما يهموش.. المهم يسحبك في خانة تانية..
- إيه اللي وداها هناك؟
- دي لابسة عباية بكباسين
- طب إيه اللي خلاها تنزل طلعت حرب وهي عارفه ان البلد متوترة؟
- وانت عملت إيه لمصر؟
- هو انت بس اللي بتفهم؟
- هو حضرتك بتفهم في العلوم الشرعية علشان تناقش مولانا؟
- النقد سهل لكن إيه الحل اللي حضرتك بتقدمه؟
- انتو ليه مش عاوزين تدوهم فرصة؟
- مش يمكن ينفع؟
- انت بتعمل زيهم وعاوزنا ناخد برأيك وبتقصي كل الآراء التانية