كلنا مع حرية البوس!

يجلس رجال الرقابة على ترابيزة طويلة مكتوب عليها لجنة الرقابة.. بينما تجلس أمامهم مخرجة الفيلم مروة وأمامها السيناريو

محكم 1: الفيلم بتاعك اسمه إيه يا أستاذة مروة؟
مروة: قبلة وعشر بوسات
محكم 1: جميل يا أستاذة.. وكويس انك استخدمت حرف الواو بينهم.. عشان الجمهور يعرف الفرق بين القبلة والبوسة.. أنا كنت متأكد إن الفيلم بتاع مخرجة عظيمة زيك هيبقى ثقافى وتعليمى.. اتفضلى
مروة: القصة باختصار بتحكى عن عشر مزز بيلوفوا على عيل سيس من بتوع الفيس بوك معشمهم بالجواز.. وكلهم بيروحوا يقابلوه ف شقته.. والفيلم كله بقى مشاهده وهوه معاهم في الشقة واحدة ورا واحدة
محكم 2: الله.. الله يا أستاذة.. أخيرا لقينا حد يعرض مشاكل الشباب ويتكلم عن اللى بيمر بيه المجتمع ومتغيرات العصر
مروة: ولسة حضرتك.. دا انا جايبة مناظر واضحة للأفلام إياها اللى الشباب بيتفرج عليها
محكم 3: جميل جدا.. كويس انك بتسلطي الضوء على هذا المرض الفظيع اللي انتشر في المجتمع
محكم 1: المهم الصور واضحة
تغمز له بعينها في خبث
مروة: وعاملين دوبلاج مصري كمان
يصرخ بفرحة
محكم 1: أيوة كده.. لازم التكنولوجيا يكون لها دور في نهضة المجتمع
مروة: دا انا كمان عاملالك توليفة زي الفل.. عشوائيات على اغتصاب على قتل.. تشكيلة ماشفتهاش في حلاوة المولد
ينتفض من السعادة
محكم 3: احنا مع حرية التعبير
محكم 2: بس أوعي يا أستاذة مروة يكون فى الفيلم أى مشاهد كده وللا كده
مروة: لا وشرفك يا أستاذ.. الفيلم هوه اللى انا حكيتهولك بس
محكم 2: طيب ممكن تقريلنا مشهد من المشاهد
تقرأ من الملف أمامها بينما يظهر الانفعال على المحكمين
مروة: يقترب البطل من البطلة.. يمسك يدها فى حنان ويقربها منه ثم يقبلها قبلة ساخنة جدا جدا جدا
محكم 1: استنى يا استاذة.. ياريت تشيلى واحدة من "جدا" دى.. وتخليها جدا جدا بس.. احنا برضه مجتمع شرقى محافظ
مروة: بس ده بيتعارض مع حرية البوس فى المجتمع.. وبعدين لازم نزود الكلام شوية فى الجزء ده عشان بعد كده كله مناظر.. مفيش كلام
محكم 1: أنا باقول بس عشان الرقابة ما تعترضش
محكم 2: جرى إيه ياريس.. احنا الرقابة
محكم 1: طيب ماشى هنعديها.. ممكن تكملى
مروة: بعد كده ياريس مفيش كلام.. أنا سايبة المشاهد لساعة التصوير ربنا يسهلها.. حسب موود الممثلين وهيبوسوا ازاى
محكم 1: ربنا معاك يا مروة.. انت فخر للجيل وخير من يقدم صورة مصر المشرفة.. بس أنا ليا طلب بسيط
مروة: كنت حاسة ان لجنة الرقابة هتبقى متزمتة كده.. اتفضل
يغمز لها بلهفة
محكم 1: ياريت تجيبيلى نسخة أول ما يظهر الفيلم.. عايز اتأكد من السيناريو ومطابقته للفيلم لوحدى.
 

التعليقات