"القناعة كنز لا يفنى" .. قول مأثور صدقته مواليد التمانينات اللي بيطلق عليه "جيل الموكوسين" واللي بيضم أكبر نسبة عوانس مضحوك عليهم بكنز القناعة .

لو انتي من مواليد التمانينات وعندك استعداد لاصلاح ما فات ، أو من مواليد التسعينات وناوية تتعلمي من اللي فات وتخرجي عن قصة جلد الذات .. فركزوا فيما هو آتٍ ..  القناعة كنز عدى عليه الزمن وفات .. ركزي تاني كلام ذوات الخبرات والأرشنات .

الجديد بقى في تكتيك اصطياد العرسان، انك تكوني طماعة عينك زايغة تعرفي تحددي الفريسة كويس وتنصبي حولها الشباك بدون ما تقولي كلمة "بحبك" أو معجبة بيك .

الرجل صائد ماهر دائمًا، خليكي فريسة بس مش أي فريسة انتي غزالة ميعرفش يمسكها كل ما يقرب تجري بسرعة، وفي نفس الوقت لازم تكوني محافظة على مساحة الجذب ليه وفاتحة له الباب بابتسامة ساحرة ، رقة أنثوية ، مكالمة تليفونية ، وكله بما يرضي الله ويشعل رغبته في الصيد ( ايموشن ضحكة شريرة ) .

تسلحي بأدوات الضغط، من الصوت الواطي " انسي التجعير اللي في البيت ومع صاحباتك" .. متستخسريش تشتري ازازة برفان وهميّة عشان تسيبي له بصمتك مستخبية .

كدة انتي وهمتيه انه صياد بس الحقيقة انك بترمي الشباك ، ولو مطلعش فيها عريس البحر متزهقيش البحر مليان سمك ، ممكن تيأسي لو اتعرفتي على مليارات الرجالة الموجودة ع الكوكب والسنارة مغمزتش مع واحد منهم " ده كلام د. إبراهيم الفقي الله يرحمه ".

المهم تكوني مرحة ولذيذة الرجالة بتطفش من النكد، واجتماعية لأنه لو عرف انك وحيدة هيتأكد انك موجودة ومش هيبزل مجهود معاكي ، هيرجع لك في وقت فراغه .
طبعا الموضوع ده بياخد شهور، لو ركزتي مع راجل واحد انتي المسئولة عن عمرك اللي هيجري .. يجوز انك تتعبي نفس الخطة مع أكتر من واحد في نفس الوقت وفي سرية تامة وبلاش والنبي تحكي لصاحبتك الأنتيم لأنها أول واحدة هتفتن عليكي .

ومن ناحية التشريع وفتوى إجازة التعدد فأحب أقولك انك لسة ملتزمتنيش بوعد الحب ، ولا الارتباط العاطفي، علشان كدة قولت لك في الاول بلاش "بحبك" ولا "معجبة بيك"، انتي بتصطادي عريس واللي يحبك يلحق يخطفك .