الصيف داخل شادد من أوله  بعد شهر رمضان ، موسم  التزاوج وحكايات الارتباط بعد الفسح والخروجات والعين دايماً على العريس العريس الوسيم الجاهز " المريش السمين " .. " الحكاية "تقدم لك بهذه المناسبة خلاصة "خبرات القرشانات "من البنات والستات على شوية نصائح من الأجانب بتوع الـ old school .

زوقيني يا ماما

1- عيد ومصيف يعني كدة كدة هتصرفي وتكلفي، بلاش تستخسري واصبغي شعرك في الكوافير بدل نتائج قوس قزح اللي بتطلعيها في البيت .

2- اضربي الكيرياتين وأمرك لله ، لو شعرك محتاجه، ده مصيف يعني رطوبة وحر وبحر وحمام سباحة وخروج بليل، يعني لو شعرك مش ناعم هتكوني شبه أمنا الغولة .

3- اهتمي بأزيائك حتى لو كنتي تخينة، اختاري اللي يليق عليكي، متركزيش مع الموضة واختاري اللي يناسب جسمك أكتر .

4- اختاري مايوه يداري عيوب جسمك، مش مهم طويل ولا قصير، مفتوح ولا مقفول المهم تكوني متناسقة فيه .

5- وانتي نازلة البحر بلاش ماكياج كتير كفاية ايلاينر waterproof طبعا عشان ميسحش وتكوني شبه الساحرة الشريرة، أما الروج فاختاريه مط بلون شفايفك عشان تكوني طبيعية اكتر ومتديش مساحة لأي ماكياج تاني يسيح من المية .

الثقة في النفس

6-  لو كنتي  قمر 14 ومش واثقة في نفسك هتلاقي الرجالة بتطفش منك ، كل الأرشانات وخبراء العلاقات بيأكدوا ان الثقة في النفس من أسرار جاذبية المرأة  .

7-  لو نصبتي الشباك لعريس وموقعش اعرفي انه مش نصيبك ، وشوفي غيره بسرعة، ده لا يقلل من ثقتك بنفسك .

دايرة معارفك

8- اتعرفي على بنات جدد في المصيف وأسر مختلفة وخليكي كيوت على قد ما تقدري، عشان معارفهم الذكورية كتيرة هتلاقي اخواتهم واولادهم واقاربهم .. إلخ .

العلم في الراس

9- اوعي تكوني صفحة بيضا لازم تظهري مثقفة ومتكلمة يعني مثلا تابعي اخر الاحداث عشان دلوقت الناس كلها بتتكلم في السياسة، اقرأي عناوين الاخبار عشان تعرفي تتكلمي كلمتين ، ولو اتفتح موضوع متعرفيش عنه حاجة ابحثي على google من موبايلك بسرعة عشان تكوني فاهمة، ومفيش مانع من مشاركة خفيفة منك في حدود اللي قرأتيه بسرعة .

حددي هدفك

10 - هتحددي هدفك بناء على ايه ؟ طبعا انتي داخلة على جواز يعني محتاجة راجل يكون كارير كويس ومناسب ليكي، يكون مظهره كويس لانه دليل لدخله ، يكون اجتماعي ومتكلم ومثقفن وفكك من قصة الأمور والبدي بلدنج دول تصاحبيهم بس لو اتجوزتيهم هيطلعوا عينك .

الفرند زون

11- أكيد مش هتتجوزي في الساحل ولا حتى هتلبسي الدبل، عشان كدة ادي نفسك مساحة تعرفي اكتر من حد وحطيهم كلهم في الفرند زون، ده بيديهم مساحة أمان أكتر لأنهم بيخافوا من البنات اللي داخلة راسمة على جواز من الأول .

اصطياد الفريسة

12- اصطياد الفريسة من الفرند زون وده بيوقف على عدة عوامل أهمها انه يكون بيطلب منك يخرج معاكي كتير، او لما تقولي انك زهقانة يبادر هو بتقديم يد العون .

13 - العامل التاني انه يكون بيحب التواجد معاكي دايما وبدأ يتكلم معاكي بحرية اكتر عن تفاصيل حياته .

14 - في الفترة دي لازم تتكلمي عن مستقبلك وتخليه هو كمان يتكلم عن مستقبله وشريكة حياته شايفها ازاي .. إلخ لحد ما يعترف انه بيحبك

التقل صنعة

15 - لما يقولك بحبك بلاش تتسحبي من لسانك وتقولي وانا كمان، اعملي نفسك متفاجأة وافرحي وقولي له دي مفاجأة جميلة مكانتش متوقعة وارغي في سكة المفاجأة والسعادة، الرجالة بيتضحك عليهم بسرعة، المهم اياكِ تاكدي له حبك في نفس التوقيت عشان زي ما اتفقنا "التقل صنعة " وبيجيبهم أسرع .

16 - بلاش تكوني الكائن اللزج الرجالة بتتخنق بسرعة، بلاش تلجأي له في كل تفاصيل حياتك من أول لون المانيكير حد لون صبغة الشعر، خليه يحس انك بتعتمدي على نفسه وانك مش عبء عليه ، ده هيدي له شعور بالأمان في علاقتكم دلوقت ومستقبلا .

17 - خليكي مشغولة دايما بلاش تكوني متاحة في كل الأوقات ، مثلا مترديش على التليفون من أول مرة وكل مرة حجة مختلفة وبلطافة تقولي انك بتذاكري او كنتي في اجتماع او في المطبخ أو بتكلمي ماما ومسمعتيش الموبايل .. إلخ

وبكدة انتي بتدي له الفرصة يعتقد انه الصائد الماهر الأكبر وانتي الفريسة الغلبانة، واخر وسائله في الصيد هي دبلة الخطوبة اللي هتدي له مساحة أكبر في حياتك .

ومبروووووووك يا عروسة .